Genesis 1
Moses nwoma a odzikan: tir 1
- Ahyɛse no Nyankopɔn bɔɔ sor nye asaase.
- Na asaase da hɔ hun eso pan; na isum agye bun enyi: na Nyankopɔn no sunsum butuuw nsu no enyi.
- Na Nyankopɔn see dɛ, Ekan mbra: na ekan bae.
- Na Nyankopɔn hun kan no dɛ oye: na Nyankopɔn tsew kan no fii sum no ho.
- Na Nyankopɔn frɛɛ ekan no Adzekyee, na isum no ɔfree no Adzesaa. Na adzesaa nye adzekyee, da kor.
- Na Nyankopɔn see dɛ, wɔmma wimu mbra nsu no finimfin, na wɔmma ɔntse nsu no mfi nsu noho.
- Na Nyankopɔn yɛɛ wimu no, na ɔtsee nsu a ɔwɔ wimu no n’ase no fii nsu a ɔwɔ wimu no no sor no ho: na ɔyɛɛ dɛm.
- Na Nyankopɔn frɛɛ wimu no Ɔsor. Na adzesaa nye adzekyee, da a otsīa ebien.
- Na Nyankopɔn see dɛ, wɔmma nsu a ɔwɔ ɔsor n’ase no ɔmpra nkɔboa fakor na wɔmma wewewdo nyi no ho: na ɔyɛɛ dɛm.
- Na Nyankopɔn frɛɛ wewewdo no asaase; na nsu no mboano no ɔfrɛɛ no Epo: na Nyankopɔn hun dɛ oye.
- Na Nyankopɔn see dɛ, Asaase mfifir efuw, nhaban a ɔsow aba, na dua a ɔsow eduaba dɛ mbɛ no su tse a n’aba wɔ mu, wɔ asaase do: na ɔyɛɛ dɛm.
- Na asaase fifiir efuw, haban a ɔsow aba dɛ mbrɛ no su tse: na Nyankopɔn hun dɛ oye.
- Na adzesaa nye adzekyee, da a otsīa ebiasa.
- Na Nyankopɔn see dɛ, Nkandzea mbra ɔsor wimu no mu mbeyi adzekyee mfi adzesaa ho: na ɔnyɛ nsɛnkyerɛdze, nye mberkyekyɛmu, nye nda nye mfe:
- na ɔnyɛ nkandzea wɔ ɔsor wimu no mu nhyerɛn asaase do: na ɔyɛɛ dɛm.
- Na Nyankopɔn yɛɛ nkandzea akɛse ebien no; kandzea kɛse no dɛ ɔnhwɛ adzekyee do, na kandzea kakraka no dɛ ɔnhwɛ adzesaa do: ɔyɛɛ nworaba so.
- Na Nyankopɔn dze sisii ɔsor wimu no mu dɛ wɔnhyerɛn asaase do,
- na wɔnhwɛ adzekyee nye adzesaa do, na onyi kan mfi sum ho: na Nyankopɔn hun dɛ oye.
- Na adzesaa nye adzekyee da a otsīa anan.
- Na Nyankopɔn see dɛ, Nsu no ndɔ mbowa a wɔkeka hɔnho a nkwa wɔ mu menyamenya na ntumbowa nkyin asaase do wɔ ɔsor wienyi.
- Na Nyankopɔn bɔɔ esubowa akese no, na mbowa a nkwa wɔ hɔn mu a wɔkeka hɔnho a nsu no dɔɔ hɔn menyamenya nyinara, dɛ mbrɛ hɔn su tsetsee: na Nyankopɔn hun dɛ oye.
- Na Nyankopɔn hyiraa hɔn see dɛ, Hom nwo, na wɔndɔr, na wɔnhyɛ po mu nsu mu mā, na ntumbowa ndɔr wɔ asaase.
- Na adzesaa nye adzekyee, da a otsīa enum.
- Na Nyankopɔn see dɛ, Asaase nwo mbowa a nkwa wɔ hɔn mu dɛ mbrɛ hɔn su tsetsee, ofiembowa, nye nketsebowa, nye asaase mbowadoma dɛ mbrɛ hɔn su tsetse: na ɔyɛɛ dɛm.
- Na Nyankopɔn yɛɛ asaase mbowa dɛ mbrɛ hɔn su tsetsee, na mbowa a wɔtsen famu nyinara dɛ mbrɛ hɔn su tsetsee: na Nyankopɔn hun dɛ oye.
- Na Nyankopɔn see dɛ, Wɔmma nyɛnyɛ nyimpa wɔ hɛn su do, wɔ yɛn saso do: na wonya tum wɔ pomu nam do, nye wimu ntumbowa do, nye ofiembowa do, nye asaase nyinara, nye nketsembowa a wɔtsen asaase do nyinara do.
- Na Nyankopɔn bɔɔ nyimpa wɔ nankasa no su do, Nyankopɔn no su do na ɔbɔɔ no; ɔbɔɔ hɔn ɔbanyin nye ɔbaa.
- Na Nyankopɔn hyeraa hɔn: na Nyankopɔn see hɔn dɛ, Hom nwo, na wɔndɔr, na wɔnhyɛ asaase mā, na wɔnhom do; na wonnya tum wɔ po mu nam do, nye wimu ntumboa do, nye mbowa a nkwa wɔ hɔn mu a wɔkeka hɔnho wɔ asaase do nyinara do.
- Na Nyankopɔn see dɛ, Hwe, mama hom haban a ɔsow aba nyinara a ɔwɔ asaase nyinara enyi, nye ndua nyinara a ɔsow eduaba a n’aba wɔ mu; ɔnyɛ edziban mma hom:
- na asaase mbowadoma nyinara, nye wimu ntombowa nyinara, nye mbowa a wɔtsen asaase do a nkwa wɔ hɔn mu nyinara, hɔn mfunoma nyinara dɛ wondzi: na ɔyɛɛ dɛm.
- Na Nyankopɔn hun adze a ɔayɛ nyinara, na hwɛ, oye papa. Na adzesaa nye adzekyee, da a otsia esia.
No comments:
Post a Comment